Vorið nálgast með sól í hjörtum.

Páskarnir eru á næsta leiti og þegar þeir eru afstaðnir er vorið eitt framundan. Þrátt fyrir stórhækkað áburðarverð vil ég hvetja fólk til að bera vel á garðana sína, byrja að setja fyrsta skammt þegar grænu nálarnar eru að byrja að gægjast upp úr sverðinum. Leyfið því að spretta fyrst um sinn en slá hiklaust um leið og grasið nær 6 og hálum cm á hæð. Rakið vel og berið strax á aftur. Gætið þess að vökva ekki of mikið ofan í áburðinn því hætt er við að hann fari þá forgörðum.

Sláið garðinn vikulega allt sumarið, vökvið í lok heitra daga, berið svo aftur á um mánaðamótin júní júlí og sáldrið svo lítilræði mánuði seinna.

Með þessu móti fæst góð rækt í garðinn, hann verður fagurgrænn og þéttur. Alger óþarfi er að ráðast á garðinn með mosaeyði, tæturum og hænsnaskít, með þeim viðbjóði sem honum jú fylgir. Mosinn kemur af órækt og best er því að halda garðinum í góðri rækt.

Fátt er meira slakandi á fögrum sumarkvölum en sitja á stól og horfa á grasið sitt vökvast.

 

 

Athugasemdir

[Kristín Jónsdóttir, 2.3.2009 kl. 20:07]

Gefin eru ráðin góð
um grasræktina fína.
Gónt ég get á græna lóð
ef geymi ég ræðu þína.

með kveðju úr mosaþembunni í Kópavoginum.
Stína

[mamma (IP-tala skráð) 2.3.2009 kl. 21:29]

Já Helgi minn, eftir þessu verður fullt starf bara, ég segi baaraa að hugsa um garðinn sinn, já og dugar  ekki að hugsa eingöngu, dugar fyrir mig því eflaust sér pabbi þinn um þetta. (Nú var ég sniðug)

Bestu kveðjur frá Fossi

[Óskar Ara (IP-tala skráð) 2.3.2009 kl. 22:51]

Aldrei bera á garðinn, allt á að gera til að hægja á þeim fjanda. Maður lendir þá ekki í því að hanga á slátturvélinni heilu og hálfu dagana. Það tekur svo mikinn tíma frá fjallgöngum og andaveiðum....kveður úr Hornafirði

[Óla (IP-tala skráð) 3.3.2009 kl. 09:43]

Óskar ég ér sammála þér

[Þórir (IP-tala skráð) 3.3.2009 kl. 17:18]

Ég á tvær gerðir grasmótora sem breyta grasi í áburð og

svo á ég líka PZ-185 sem ég set aftan í bláa zetorinn og

ryð öllu niður í einum grænum! heppinn ég!!!!!

[Gunnlaugur B. Ó (IP-tala skráð) 4.3.2009 kl. 12:16]

Kæri vinur.

Ég sendi þér innilegar hamingjuóskir á afmælisdaginn, með von um gott og kærleiksríkt flæði.

[Kristín Jónsdóttir, 4.3.2009 kl. 21:45]

Sendi þér góðar kveðjur á afmælisdaginn kæri frændi. Ertu nú 39b eða ertu bara sáttur við raunveruleikann?

[HP Foss, 5.3.2009 kl. 08:45]

41., svallkaldur og sáttur 

takk fyrir kveðjur.