Ballið í Öræfum

Ferðin austur í Öræfi var stutt, þ.e.a.s. við vorum fljótir austur. Hlaðið á Hofi var smekkfyllt af bílum, svo til, hafa sennilega verið hátt í 25 bílar. Flestir voru þeir úr Öræfunum, voru einhvernvegin öræfalegir að sjá , allavega.

Ballið var gríðar gott, Upplyfting að spila og stemningin hin besta.  Hljómsveitin var góð og enn betri þegar söngkonan var leyst að í miðasölunni. Gítarleikarinn gat lítið sungið því hann var upptekinn við að stilla trommuheilann í réttan takt. trommuleikarinn hafði ekki komst í þetta gigg.

Dansinn dunaði fram eftir nóttu, kjaftfullt hús og því greinilegt að fleiri en einn voru í hverjum bíl, þarna hafa áreiðanlega verið hátt í 50 mans.  Reglulega var fólk látið setjast, bandið þagnaði og maður með svartan ruslapoka þaut einn hring um salinn og tók tómar dósir af borðunum. Hann hvarf inn um hurð en bandið tók ekki til við að spila. Maðurinn átti nefnilega eftir að koma annan hring og þá var hann með kaffipoka. Stráði kaffi á gólfið þannig að á svipstundu ilmaði samkomuhúsið á Hofi eins og kaffibrennsla Kaaber.

Eftir þessa serimoníu var dansað á ný og svona gekk kvöldið. Hótelstelpurnar voru þarna en við Palli virtum þær að vettugi. Það sama gilti um vinnufélagana.

Ferðin heim gekk enn betur, vorum snöggir heim. Svona voru þá böllin í Öræfunum.

Athugasemdir

[Karl Tómasson, 26.2.2009 kl. 21:22]

Sniðugt að setja kaffi á gólfið.

Fyrir sunnan er sett kartöflumjöl.

Sennilega eru skórnir í sveitinni grófbotnari.

Bestu kveðjur úr Mosó frá K. Tomm.

P.s.

Komnir í kaffi stuð

karlarnir frá Fossi

[Svavar (IP-tala skráð) 4.3.2009 kl. 23:21]

Við Öræfinar eigum inni skýringu hjá þér á því hvað áttu þú við að ballgestir hafi verið "öræfalegir" ?  Voru það kannski bara bílarnir ?