Þeir gusa mest sem grynnst vaða

Föstudagur, 30. janúar 2009

Ónýtt Útsvar hjá RUV

Get ekki orða bundist, er búinn að fá mig fullsaddan af Kópavogsliðinu í Útsvarinu í Sjónvarpinu. Þessi sjálfumglöðu, hrútleiðinlegu leiðindaspjöld eru langleiðina komin með að eyðileggja þennan annars frábæra sjónvarpsþátt. Sjónvarpsþátt þar sem venjulegt fólk kemur saman til að keppa í léttstemdri spurningakeppni þar sem frekar er málið að vera með og hafa gaman af en endilega að vinna.

Koma þá þessir pabbastrákar og hefja heimsmeistarakeppni í Gettu Betur Old boys??. Menn sem ekki geta tekið til á eigin skrifborðum, strákapjakkar sem líta niður til annarra keppenda, pjakkar sem gera allt til að vinna þessa annars skemmtilegu keppni með frábærum stjórendum.

Í Gettu betur er svona lið frábært, enda keppnin þar af allt öðrum toga.

Nei, takk, ekki meir af þessu fyrir mig, mér finnst þetta svona svipað og ryðjast inn í sjöárabekk, svara öllum spurningum á undan krökkunum og berja sér svo á brjóst.

Ég hef skömm á Kópavogi fyrir þetta!

Helgi

Flokkur: Bloggar | Facebook

Athugasemdir

Uss já, ég tek undir það. Skamm Kópavogur! Ég sé bara Gunna Birgis fyrir mér, "Það er gott að ljúga í Kópavogi". Annars hafði ég gaman að færslunum um brúna Willysinn hans Kára. Ég á sérstakar minningar um þennan bíl. Fékk einu sinni far með Braga Gunnarssyni á Klaustur. Þá átti Bragi Rambler American, 60 og eitthvað módel 4dyra meðalstærð af amerískum kagga. Bragi var búinn að setja tjúnaða chevy 350 í hann, sem skilaði alvöru afli. Ég fékk að vita það í upphafi ferðar að Kári hefði fundið willys við fjárhús undir eyjafjöllum, og átti að kíkja á það dæmi á leiðinni. Umsamið verð var 30.000 og átti ég að keyra hann austur, með spotta í Ramblerinn, til málamynda. Við mætum á staðinn, og smávaxin kona kom til dyra, og fór svo að ná í bíleigandann. Hann kom út, og þurfti að troða sér út um dyrnar, stóð svo og gnæfði yfir okkur Braga, herðabreiðari en við báðir til samans. "Sæll og blessaður" sagði Bragi. "Já blessaður" sagði þá tröllið, afar skrækum rómi, og tók í hendina á Braga, sem bar þess merki næstu vikuna a.m.k. Við fórum og skoðuðum þann brúna, sem fór ekki gang. Tóku þá við samningaviðræður um verðið. Bragi: "Heyrðu, hann fer ekki í gang, hvað segirðu um 25.000 ?" Tröllið:"Já já B: en 20.000?" T:"´Já já." B: "En 15.000" Tröllið:.....þögn...."Jaa..jájá." Það varð úr, og síðan var bundið í þann brúna, og brunað af stað. Ég var undir stýri á willysnum, og þurfti nokkra einbeitingu við "aksturinn". Fyrst um sinn var bara eðlilegur hraði, en þegar á þjóðveginn var komið, var gefið í svo að söng og hvein í gamla willysinum og var æsispennandi hvort tækist að pumpa nógu hratt og fast á bremsurnar til þess að lenda ekki aftan á ramblernum þegar að hann sló af eða bremsaði. Auk þess voru bremsurnar, ójafnar og leitaði willysinn út og suður þegar tókst að bremsa eitthvað að ráði. Svo dimmdi, og malbikið endaði, og það fór að rigna. Drullan sprautaðist aftur úr ramblernum, á framrúðuna hjá mér, og og rúðuþurrkan kláraði fljótlega það litla rafmagn sem eftir var á geyminum. Ég sá bara glitta í afturljósin á ramblernum í gegnum drulluna, og hafði enga tilfinnningu fyrir fjarlægðinni milli bílanna, eða hvar ég var á veginum. Hraðinn hefur verið ca 80 - 100 á holóttum malarvegi, og svo voru hvörf í honum. Þetta er "næstum" því það versta sem ég hef upplifað. Í örvæntingu reif ég í þurrkumótorinn og tókst að snúa honum, og þurrka þannig af framrúðunni, með því að þvinga mótorinn til og frá. Mig minnir að við höfum stoppað einu sinni, í Tungunum. Mér tókst einhvernveginn að gera viðvart, eða Bragi var bara að gá hvort ég væri þarna ennþá. Ég bað um að það yrði farið aðeins hægar, en gat ekki viðurkennt hvað ég var hræddur, það var bara svo gott, að vera lifandi. Við vorum auk þess alveg að koma aftur á malbik, en þá var búið að malbika einbreiða kaflann gegnum eldhraunið. Daginn eftir tókst Kára að koma honum í gang. Ég man að ég horfði á þennan bíl, á hlaðinu við sláturhúsið og hugsaði að almættið hlyti að vera til í raun og veru.

Njörður Lárusson (IP-tala skráð) 31.1.2009 kl. 11:03