Haustsagan. ( gömul)

 

Nú eru féð komið á gjöf og bóndinn getur farið að telja hvað eftir er af rúllunum frá í fyrra. Jarpur setur rassgatið í gaddavírinn og rennir sér til hægri og vinstri þar til kláðinn er að mestu horfinn. Aðfarir þessar minna á vinnukonurnar í þá gömlu góðu daga þegar fólk klóraði sér þar sem það klæjaði, án þess að vera með feluleik í kringum það.

Gaddavírinn þoldi álagið og Jarpur heldur áfram að éta. Hann hefur reyndar verið að því í allmörg ár, þegar hann er ekki annað að gera. þetta ótrúlega, áfergjulega, át, virðist hafa farið á fullan skrið eftir að húsbóndi hans ákvað að hann (Jarpur) skyldi hætta að eltast við hitt kynið.

Var ákvörðun þessi tekin út í rétt á vordegi nokkrum og gat ég ekki séð að Jarpur greyið hefði nokkuð um það að segja. Hinsvegar nutu hundarnir þessarar ákvörðunar á vissan hátt, fóru pakksaddir heim. Það var eins og við manninn mælt, Jarpur leit ekki við nokkurri hryssu eftir þetta og ef ekki var smölun í gangi, þá var hann að éta.
Ósjálfrátt verður maður hugsi. Getur verið að hér sé að finna eitthvað sem maður kannast við? Hverfi maður nokkur ár aftur í tímann, rámar mann í stæltan strák sem gat hlaupið upp í miðjar hlíðar Lómagnúps, smalað heiðina aleinn, gangandi. Allt var hægt. Nú fær maður andateppu af því einu að rölta út í sjoppu.
Síðastliðin 14 ár hefur verið óstöðvandi át á þessum manni, allt frá því að hann hætti að leita að maka.  Ef ekki er verið að sofa, þá er verið að éta.
Dæmi eru þó um það að menn hafi farið einskonar aftur á stjá og þannig hafi þeir dottið í gamla farið- holdarfarið, orðið eins og tryppi á ný.
Ætli þetta verði harður vetur?

Athugasemdir

[Sigurður Hreiðar, 10.11.2008 kl. 13:24]

hrollvekjandi skírskotun frá Jarpi inn í mannlífið, HP!

En -- ég hef veður af því að ég hafi misboðið þér óvart á dögunum. Sé það læknandi langar mig að senda mér aftur samskonar nótu og þá -- ég kann það ekki sjálfur.

Góð kveðja

[HP Foss, 10.11.2008 kl. 14:00]

Sæll Sigurður Hreiðar.  Misboðið var mér nú ekki og því þarfnast það ekki lækninga, enda rökstuddir þú ákvörðun þína afar vel og kurteisilega.
Hinsvegar var ég svekktur. En það er allt um garð gengið.
Kveðja- Helgi