Heiðin

Sól skein í heiði í vestan logninu. Menn og hundar í sínu besta skapi, klárarnir nöguðu kampinn á gamla hesthúsinu. Þeir voru búnir að jafna sig eftir afréttisferðina, vel í stakk búnir til að smala heiðina. Múgur og margmenni tóku þátt, heil hersing af upprennandi smölum fóru með nokkrum alvönum upp Bröttubrekku og vestur brúnir. Enn aðrir upp Merkidal. Inn með Þverárvatni fór hestamaðurinn í hópnum, með tvo til reiðar, strá í munni og raulaði lag sem var vinsælt þegar rakstrarvélin var ný. Nokkrir voru á hjólum, fóru sér að engu óðslega, inn í Horn og fram  heiði á móti sólinni. Drifhvítar ærnar runnu á undan smölunum á þessum unaðslega degi. Björn settist á brún Bjarnarháls, horfði yfir Seldalinn og hugsaði málið.

Athugasemdir

[Valdi Kaldi, 8.9.2008 kl. 14:06]

Menn svitnuðu mismikið þarna, það er rétt.

[Einar (IP-tala skráð) 8.9.2008 kl. 18:37]

Mikið var nú gott að rekast á þig hér á veraldarvefnum og svona skáldmæltan að vanda. Mikið hrifinn af fallegum myndum af ægifögrum heiðum.

kveðjur úr landi kommanna

Einar Kjartan

[HP Foss, 10.9.2008 kl. 08:07]

Ballið var í ár, satt er það. En það var bara of seint byrjað að slá bumbur.  Ég held að það væri ráð að hafa ballið frá 20-24, í stað 24-03, þá væri kannski möguleiki fyrir okkur að vaka fram í svona eins og hálft ballið.

[Karl Tómasson, 11.9.2008 kl. 11:58]

Nú er heiðin heimsins endi,

hola í sjálfu helvíti.

Kveðja úr sveit Mosanna. K. Tomm.

[HP Foss, 11.9.2008 kl. 21:47]

Já Kalli, Huldumenn var og er frábær plata og textarnir hans Þóris magnaðir, ein og í heiðinni, sem þessar línur eru jú úr. Þessi texti kemur þó sjaldan upp í huga minn þegar ég smala heiðina heima, til þess gengur það yfirleitt of vel.

Kveðja úr firðinum í Mosó.

[Ketill Sigurjónsson, 19.9.2008 kl. 23:09]

Snilldar myndir.

Vona að það fari að stytta upp, svo maður geti skotist á fjöll.