Stígvélafótbolti á Klaustri um verslunarmannahelgina!

 Hinn árlegi stígvélafótbolti, verður haldinn 3. árið í röð, á sparkvellinum á Klaustri,  laugardaginn 2. ágúst kl 16.

Allir eru velkomnir að spila með, karlar, konur, börn gamalmenni, sköllóttir, síðhærðir, brotfluttir, innfæddir, kyrrsettir, háttsettir og lágtsettir.

Það eina sem til þarf til að vera gjaldgengur, er að vera í stígvélum.

Reglurnar verða settar á staðnum, fer eftir fjölda þátttakanda.

Hver leikur verður u.þ.b. 2x15 mínútur.

Sjáumst öll hress að vanda!

Stígvélafótboltinn var settur á fyrir 3 árum til að rétta hlut sveitamanna sem höfðu borið ljót ör á sálum sínum eftir viðureignir við Klausturstrákana í fótboltanum í frímínútum í Kirkjubæjarskóla.

Iðulega settu þeir þau skilyrði á spilað væri "Klaustur á móti rest" Það fór sjaldan vel. Klaustursstrákarnir voru synir læknisins, dýralækninins, bankastjóranna, skólastjórans, kennaranna,kaupfélagsstjórans og slíkra fyrirmanna hreppsins, ss, af góðum mönnum komnir.Áttu þeir því allir takkaskó.

Við sveitamenn vorum hinsvegar í stígvélum.Því var stígvélafótboltinn, fyrsta árið, spilaður "Klaustur á móti rest" en þá allir í stígvélum og hugsuðu sveitamenn sér gott til glóðarinnar, nú skyldi ná fram hefndum.

Leikurinn var flutaður af í stöðunni 10-0, fyrir Klaustursstrákunum.

Ekki er lengur skipt í lið  eftir uppruna.

 

Athugasemdir

[Laufey (IP-tala skráð) 21.7.2008 kl. 09:36]

Þannig að þarna hefur sannast máltæki " Árinni kennir illur ræðari"

góða skemtun á fótboltanum.

[Karl Tómasson, 21.7.2008 kl. 18:22]

Hvert er þátttökugjaldið?

[Sigrún Inga (IP-tala skráð) 28.7.2008 kl. 10:19]

Verður ekki örugglega læknir á staðnum??? Miðað við aðfarirnar í fyrra þá veitir ekki af!! Það var nú reyndar dýralæknir á staðnum í fyrra,hún hefði nú alveg getað tjaslað liðinu saman. Hlakka mikið til að sjá þennan annars merkilega fótbolta og skemmtilegar tæklingar