Grái fiðringurinn.

Nú eru féð komið á gjöf og bóndinn getur farið að telja hvað eftir er af rúllunum frá í fyrra. Jarpur setur rassgatið í gaddavírinn og rennir sér til hægri og vinstri þar til kláðinn er að mestu horfinn. Aðfarir þessar minna á vinnukonurnar í þá gömlu góðu daga þegar fólk klóraði sér þar sem það klæjaði, án þess að vera með feluleik í kringum það. Nú á dögum þorir enginn að hreyfa, hvorki legg né lið, heldur frekar að iða eins og allar lýs hreppsins séu mættar í norðurendann og haldi þar íþróttamót.

Gaddavírinn þoldi álagið og Jarpur heldur áfram að éta. Hann hefur reyndar verið að því í allmörg ár, þegar hann er ekki annað að gera. þetta ótrúlega, áfergjulega át, virðist hafa farið á fullan skrið eftir að húsbóndinn ákvað að hann (Jarpur) skyldi hætta að eltast við hitt kynið. Var ákvörðun þessi tekin úti í rétt á vordegi nokkrum og gat ég ekki séð að Jarpur greyið hefði nokkuð um það að segja. Hinsvegar nutu hundarnir þessarar ákvörðunar á vissan hátt, fóru pakksaddir heim.

Það var eins og við manninn mælt, Jarpur leit ekki við nokkurri hryssu eftir þetta og ef ekki var smölun í gangi, þá var hann að éta?
Ósjálfrátt verður maður hugsi. Getur verið að hér sé að finna eitthvað sem maður kannast við?

Hverfi maður nokkur ár aftur í tímann, rámar mann í stæltan strák sem gat hlaupið upp í miðjar hlíðar Lómagnúps, smalað heiðina aleinn, gangandi. Allt var hægt. Nú fær maður andateppu af því einu að rölta út í sjoppu eftir hamborgaranum. Síðastliðin 17 ár hefur verið óstöðvandi át á þessum manni, allt frá því að hann hætti að leita eftir hinu kyninu. Ef hann ekki liggur á meltunni, þá er hann að éta.

 Dæmi eru um það að menn hafi farið einskonar aftur á stjá, svona eftir fertugt og þannig hafi þeir dottið í gamla farið- holdarfarið, orðið eins og tryppi á ný stæltir og glæsilegir.

Ætli þetta verði harður vetur?

Athugasemdir

[Sigrún Inga (IP-tala skráð) 13.12.2007 kl. 10:51]

Drífðu þig bara í ræktina Helgi minn og allt mun verða svo mikið betra....er það ekki annars!! Konan mun ekki láta þig í friði og stelpurnar slefa á eftir þér hérna eins og í denn ha ha. Væri ekki gaman að sleppa hamborgaranum og upplifa þessa sælu aftur...eða var þetta ekki örugglega sæla???

Jólakveðja

Sigrún Inga

[Valdi Kaldi, 14.12.2007 kl. 10:31]

Þetta var eintómt vesen :-)

[Kristín Jónsdóttir, 14.12.2007 kl. 16:21]

Jarpur átti ekki völina, bara kvölina - þú átt bæði!