Saga höfð eftir Helga Eiríkssyni á Fossi

Við Matthías Stefánsson, bóndi í Miðbæ hér á Fossi, fórum einu sinni á Fossfjöru um sumarmál. Veðrið gat ekki betra verið, glaða sólskin, logn og gott skyggni. Þetta hélst daglangt. Ekkert gerðist sögulegt hjá okkur félögunum þar til við áttum skammt ófarið að Veiðiós sem þá var austast á Hörgslandsfjöru. Vestan við fjöruna, utan við ósinn,  sáum við mann koma á móálóttum hesti. Hann reið austur fjöruna, rétt ofan við sjávarmál. Ég sagði við Mattías: "Þessi hestur er frá Hörgsdal.." "Nei , " kvað Matthías, sem var sérstaklega glöggur á hesta og sauðfé. "Þá er hann frá Keldunúpi." sagði ég "Ekki heldur," andmælti Matthías, og bætti við:" Ég þekki ekki þennan hest og veit ekki hvaðan hann er kominn".             Maðurinn handan við ósinn hélt för sinni rakleitt áfram. Brátt var hann kominn að ósnum og út í hann reið hann hiklaust, rétt innan við úthafsöldurnar. Þá var ferð hans orðin óðs mans æði. Óðum dýpkaði á þeim móálótta, brátt var vatnið á miðjar síður og fyrr en varði hrokasund. Við flýttum okkur  að útfallin. Í sama bili og við komum að því beindi þessi furðulegi reiðmaður hesti sínum beint út til hafs. Þá fyrst gerðum við Matthías okkur grein fyrir því að ekki myndi hann eða hesturinn lúta sömu lögum og við. Upp úr öldukvikinu bar fyrst höfuð hestsins og reiðmanninn sem sat keikur á honum. Við sáum að hann var á efra aldri, alskeggjaður og hárið grátt. Brátt reið mikið ólag inn úr ósnum. Það bar yfir mann og hest. Hvorugur kom aftur í ljós, enda áttum við ekki von á því.

            Þetta er eitt af því fáa sem fyrir mig hefur  borið sem ég á erfitt með að skýra.

Áður birt í bandaríkjunum 2004 

Athugasemdir

[Valdi Kaldi, 1.12.2007 kl. 23:58]

Ég kannast við þennan mann.  Hann heitir "Bakkus" og sá móálótti gengur undir nafninu "Staupir".

[Karl Tómasson, 4.12.2007 kl. 13:32]

Þetta er merkileg saga. Hvað varð til þess að hún var fyrst birt í Bandaríkjunum? Það vekur forvitni.

Bestu kveðjur frá K. Tomm.

[HP Foss, 4.12.2007 kl. 21:09]

Þá var ég með blogsíðu áblogspot.com, sem er bandarískt dæmi.