Skaftárvirkjun

það verður nú meiri munurinn þegar búið verður að virkja þessa kolmórauðu á, sem flæmist um með sinni eyðileggingu,  flestum til ama og leiðinda. Þegar Lakalón verður orðið að veruleika verður þessi líka fína tæra spræna algert augnayndi. 

Heimamenn koma ár sinni fyrir borð á meðan framkvæmdum stendur, taka vel á því og leggja grunninn að velferð framtíðarinnar.

Hátækniiðnaðurinn blómstrar þá utan í hverjum hól og ferðamennskan sem aldrei fyrr. Siglt verður með ferðamennina til að skoða Lakagígana og í Laka sjálfum verður veitingastaður og sögusafn.

Bændur geta gengið að ám sínum vísum í þeim hólma sem þeir settu þær í um vorið og kjötið því sérmerkt þeim gíg sem það var alið á.

Lakalamb á diskinn þinn. Hljómar vel.

Þegar þetta er allt um garð gengið, þá flytjum við öll hin austur til að sinna því sem heimamenn eru hættir að nenna að gera í góðærinu, taka upp kartöflur, stinga út skán, gera við girðingar og fleira í þeim dúr.

þetta verður gott.

Athugasemdir

[Árni Gunnarsson, 19.9.2007 kl. 14:39]

Hirða skánina og þurrka, það er málið. Það er svoleiðis bragð sem mér finnst svo mikið vanta í hangiketið núorðið.

[Kristín Jónsdóttir, 19.9.2007 kl. 20:55]

Ófögur er þín framtíðarsýn

en freistandi á að hlýða.

Ef burtflognir flytja heim til sín

og frjálsir þar ellinnar bíða?

[Karl Tómasson, 19.9.2007 kl. 22:01]

Fagur er Fossinn.

Bestu kveðjur frá Kalla Tomm úr Mosó.

[Valdi Kaldi, 19.9.2007 kl. 22:43]

Ofan á allt annað vesen getur maður þá átt von á því að verða sjóveikur í fyrsta safni?

[Valdi Kaldi, 20.9.2007 kl. 11:24]

Eins og þeir vita sem hafa farið til fjalla í leit að kindum þá verða menn ekki þunnir þó að menn fái sér söngolíu þegar heim í kofa er komið.  Því veldur hreint fjallaloftið og dásamlegur matur ráðskonunnar.  Varðandi hlutverk mitt á afrétti að þá hef ég tvö hlutverk.  Ég er látinn hlaupa þegar sveitamenn og hundar þeirra hafa gefist upp enda eru þeir flestir orðnir gamlir og hjassalegir.  Þar kemur sér vel áratuga knattspyrnuiðkun á fótboltavelli okkar strákanna á Klaustri sem var jafn ósléttur og afréttur austur-Síðumanna.  Svo sé ég líka um að skenkja Koníaki í Kónginn.  Það er mikið ábyrgðarstarf.

[HP Foss, 20.9.2007 kl. 13:10]

Ég veit ekki hvað hún Halla er að þenja sig, fer nú aldrei í afrétt. það er ekki það sama að sitja á réttarveggnum í Dalbæjarrétt og sötra kakó úr plastglasi.

Halla, hann Valdi stendur sig vel. Léttur í fasi og spori.

[HP Foss, 21.9.2007 kl. 07:50]

Og sannast þá hið fornkveðna: "Oft ratast kjöftugum satt á munn" eða í þessu tilfelli, " á fingur"