Skaftfellingar hógværir?

Magnað er að hlusta á fambjóðendurna okkar ræða landsbyggðina. Það eina sem þeir sjá fyrir sér á svæðinu austan Mýrdalssands er að breikka brýrnar, sem ætti nú bara að vera sjálfsagt, aðeins til að geta verið skjótari í förum í gegnum þessar strjálu byggðir. Grétar Mar var þarna á ferð og greinilega Atli Gíslason líka og voru þeir sammála um þetta. Tillögur um leiðir til úrbóta verða að koma annarsstaðar en frá stjórnmálamönnunum. Atli nefndi Klausturbleikju, sem er gott framtak einstaklinga, ekki hafði hann annað. Og ekki var það honum að þakka, svo mikið er víst.

Heimamenn verða að bíta í skjaldarrendur og rísa á afturlappirnar, það gera það engir fyrir þá. Þingmenn virðast ekki hafa nokkurn einasta áhuga  á þessu svæði, til þess eru men líklega of fáir og þeir sem eru þar eru og hógværir. Það að ríkið sendi eitthvað af þeim störfum sem þeir tala um að senda út á land komi þangað er úr sögunni. Hefur líklega aldrei verið það.

Öll þjónusta fer halloka, pósturinn, bankarnir, sláturhúsið. Kannski heyrist ekki nóg frá fólkinu, kannski eru mótmælin aðeins muldur ofaní bringu. Það er nefnilega ekki Skaftfellingi sæmandi að belgja sig og ausa úr viskubrunnum, eins og sagt var um okkur brottflutta um daginn.

Talandi um það. Óttalega er nú lífllaust á Klaustur. is. Þetta er kannski akkúrat eins og fólkið vill hafa það , frið og afskiptaleysi? Tæplega.

Athugasemdir

[Valdi Kaldi, 23.4.2007 kl. 18:31]

Maður þorir nú ekki fyrir sitt litla líf að skrifa neitt inn á klaustur.is.  Kjartan gæti orðið brjálaður.

[Kristín Jónsdóttir, 23.4.2007 kl. 21:49]

Svarið er já, Skaftfellingar eru hógværir. Hver kannast ekki við skaftfellska frasann "ef mig skyldi kalla". Hvað er best til ráða veit ég ekki en eitthvað þarf að gerast ef sveitin á ekki að enda í eyði, kvótinn kominn í aðra landshluta og eina starfsemin verði að skúra í kringum ferðalanga tæpa 3 mánuði á ári.